دي الحالة اللي متبقاش فاهم انت عايز ايه و مش مضايق. في حالتي انا بعمل حاجات كتير و تغيرات كتير اوي بس كله في عالم احلامي و خيالاتي الجميل.
عندي عالم موازي لعالمكم. عالم الوانه بتتغير كل يوم. عالم يوم في تلج و يوم في شمس. عالم لو بصيت فيه على اليمين هتلاقي البدر منور السماء السوداء و النجوم زي اللالئ مستمتعة من فوق على منظر الموج و هو بيسلم على شط الرمال. و عالشمال فيه شمس ساطعة مرسلة اشعتها الحنونة على غابة واسعة فيها من الشجر انواع، الفواكهة و الورود حتى الخضار. عالم عندي فيه كلب وفي و جميل. عالمي مدخلوش بشر غيري و يوم لما بتختلط خيالاتي ببعضها و يتداخل عالمي الجميل بعالمكم العجيب بيتعكر مزاجي!
عالمي فيه انا بطير و بنط عالي، بعرف فيه اغني و اخيط و اطبخ و اعمل كل حاجة. كل حاجة فيه بتضحك و لا جه في يوم شوفت فيه دموع أو حزن. لا يعرف الموت طريق لعالمي و يوم ما هيزحف الموت لقلبه هيكون كمان أنا قلبي مات!
